قسم بأسمه جمالك وبدلالك
لسكت الكلب لوعافك وبدلالك
شفت صحره بوسط عينك وبدلالك
الغاز متيهة بحلها البريه
وحك انس الكون واملاكه وجنه
فقط حبك شده عكلي وجنه
انه جم جنه شفت غيرك وجنه
واضل اهواك لونار صبحت ليه
سهام حبك صابن الدلال والمن
وشفتهة انه بحلاه السلوى والمن
عليمن اكتب انا اشعار والمن
ووصف حبك ماتدبره الجاهليه
درب حبك بألم سايرته وشقه
وتعال ابحث وسط دلالي وشقه
وانظر بيتين الك وحدك وشقه
وحديقه الكبد فوكاهن هديه
دفنت الروح جيه غيرك وصلته
من كطعو حبل ودهم وصلته
ثلم جبدي صفو وسفه وصلته
ونسيت انك اعز انسان اليه
عطشت وجذب يروي ماي حبك
و من باجر كلبي قرر ما يحبك
سلس ما ينلزم صاير ماي حبك
اكمشنه ردت وكظيت ايديه
انه بير الموده وانت داري
واداري بشوك هجرك وانت داري
تدري الناس احبك وانت داري
وظن تخفي اهتمامك بس عليه
يهل ذكره صفه للروح ونسه
ويمن جننت جن الكون ونسه
تريد ابعد عليك بيوم ونسه
اذا انساك اذن جتني المنيه
اريد اعلن حرب بسمك وشن بيك
على العذال البظهرك وشن بيك
يكولن زين ماعندك وشن بيك
وانه مجربك فما ضحكن عليه
قبلت تجرحني وادري الجرح مالوم
و عكب شمات منك صرت مالوم
رغم كل هذا لكن بيك مالوم
لأن تدري انه احبك مو بديه
اريد اعكد نفسي لأجلك وانت حلني
ولغز صرت بسبب حبك وانت حلني
تعال اكعد بدل شخصي وانت حلني
وشوف انت حبك شمسوي بيه
بقلمي// الوردة الحمراء
